إعلامنا.....#E3lamna جبهة الإعلام الثوري

" ياريت تسامحونا لأنو المره دي الكلام دش ومجعلص على ابوه ومفيش هزار "

منذ ما قبل الثورة بسنوات والإعلام الحكومي سواء كان رسمياً أو غير رسماً يمارس العهر الإعلامي والدعارة السياسية لمن في السلطة بكل ما أوتي من قوه وبشتى الطرق وخروج المنظومة بكل مشتملتها عن العملية الإعلامية والوصول إلى ما قد يصل إلي مرحلة ممارسة "الجنس الفموي " لكل من هو في السلطة ، حتى بعد الثورة تآمر الإعلام على الثورة من أول لحظة لسقوط رأس النظام السابق (والذي مازال قائماً) بعملية ممنهجه لغسيل العقول والادمغه وعدم إيصال الشحنة الثورية إلى عموم الشعب وذلك عن طريق عدة خطوات نوجزها فيما يلي :-

أولا :-    غلق الطريق والتشويش على أي جهة غير الإعلام الحكومي في نقل وجهة النظر الثورية والتعبير عن الثورة وذلك عن طريق احتكار المنظومة الإعلامية إما في يد الحكومة والنظام القائم الموالي للنظام السابق أو عن طريق فرض قيود على الوسائل الإعلام الخاصة إما عن طريق الرقابة أو بالضغط على ملاكها وهم في الأغلب رجال إعمال مواليين للنظام السابق إما لاستفادتهم منه أو لمشاركته في جرام اقتصاديه ضد الشعب ، ومن هنا أصبح نفس الرموز والأشخاص الغير ثوريين الذين كانوا ومازالوا ضد الثورة هم من يعبرون عن الثورة فأصبحت الثورة بالنسبة للمتلقين شيئاً مبهماً ومشوش.

ثانياً :-          القيام بعملية ممنهجه لاختزال الثورة في مجموعة من القيم الأخلاقية وحملات النظافة وتجميل الطرق وعدم التعرض للجوانب السياسية الثورية وإغفالها تماماً

ثالثاً:-           عدم إبراز أو تسليط الضوء على مدى فساد وبشاعة النظام القديم وإفساده للحياة السياسية والاقتصادية والاكتفاء بإبراز بعض قضايا إهدار المال العام والتي لا ترتقى ل1% من كم الفساد الذي تفشى في السلطة

رابعاَ :-         عدم إظهار بشاعة الاعتداءات على المتظاهرين إبان الثورة ومعاناتهم في اعتصام ال18 يوم مع عدم التعرض لوجهة نظر الثوار في قضايا قتل المتظاهرين

خامسا :-       تسليط الضوء على أعداء الثورة وفتح المجال لهم لتشويه صورة الثورة والثوار ومحاولات مستمرة لتحسين صورتهم وإظهار إن النظام السابق لم يكن بالسوء الذي يتحدث عنه الثوار

سادساَ :-       تعمد إظهار مطالب الثورة على أنها مطالب اقتصادية فئوية ليست في مصلحة الوطن أو المواطن العادي.

سابعاُ:-         تعليق أسباب تردي الأوضاع الأمنية والاقتصادية على المظاهرات والإعتصامات على غير الحقيقة

وأخيراً :-      الوقوف ضد كل ما هو ثوري وإظهاره على انه مؤامرة لتدمير وتخريب البلاد

وبناءً على ما سبق يتجلى لنا إن الكيان الإعلامي الحكومي بشقيه قد توغل وتغول الفساد فيه لدرجة يستحيل معها الإصلاح ويجب مواجهتها واعتبار هذه المواجهة معركة مصيرية من معارك الثورة .

ومن هنا ولدت الفكرة انه حتى هذه اللحظة لم يوجد كيان معبر عن الثورة سوى بعض البرامج على قناتين فضائيتين لا يستطيعون خوض غمار هذه الحرب الضروس مع الآلة الإعلامية الضخمة فرادى نظراً لتحكم رجال الأعمال (رأس المال في هذه القنوات وهم بمثابة الآمر الناهي ) من جهة ومن جهة أخرى انعدام وصعوبة التنسيق بين الكيانات الإعلامية الثورية رغم ضئالتها لذلك اتجهت إلى هذه المبادرة "إعلامنا ".... وهي تقوم على إنشاء كيان شعبي ثوري موجهه يقوم بمهام الإعلام والاتصال الجماهيري وفي نفس الوقت يكون جبهة إعلامية ثورية لمواجهة الآلة الإعلامية الحكومية ، ويكون صوت جماهير الثورة وصورتهم إلى الشعب .

وتقوم فكرة هذا الكيان على المواجهة المنظمة على ستة جبهات أو محاور رئيسية على النحو الآتي:-

1.    الإعلام          Mass communication

2.    الدعاية          Propaganda

3.    الأخبار          News Broadcast

4.    التوعية والإرشاد      Public Awareness

5.    الدعم            Support and Resources

6.    الجبهة الالكترونية Cyber Frontier

وفيما يلي سنتعرض لدور كل محور أو جبهة على حده لعرض دور كل منهم 

المحور الأول :- الإعلام Mass Communication

ترتكز هذه الجبهة على المواجهة على أربعة جبهات إعلامية على النحو التالي :-

1- الإعلام المرئي

2- الإعلام المسموع

3- الإعلام المقروء

4- الإعلام الالكتروني

أولاً :- الإعلام المرئي (التلفزيون):-

وتقوم ألفكره على إنشاء كيان تلفزيوني أو أكثر يبث إرساله على الثلاث اصعده المتاحة في مصر ( ارضي - فضائي - انترنت ) ويتضمن محتوى إعلامي ثوري جاد موجهه إلي عموم الشعب المصري ويهدف إلي إخراجهم مرة أخرى من حالة الخمول السياسي والعزوف عن المشاركة وحملهم على المشاركة الفعالة في الحالة الثورية المراد الوصول إليها سواء سلباً أو إيجابا - مع مراعاة الخلفيات الثقافية والاجتماعية للمتلقين .

ثانياً :- الإعلام المسموع ( الإذاعة ):-

وهو يكون على نفس غرار النقطة السابقة الا انها تعتمد على ثلاثة قنوات اذاعية بأختلاف المتلقين ( عامة - شبابية - عامة ناطقة بالانجليزية ) وتعتمد على كلٍ من البث الاذاعي FM ومن خلال الانترنت

ثالثاً : الاعلام المقروء ( الصحافة والنشر ) :-

تقوم فكرة المواجهة في هذا المجال على عدة جوانب نوجزها في الآتي :-

أ- جريدة ثورية معبرة عن كافة اطياف المشاركين في الثورة وتهدف الى الوصول الى اكبر عدد ممكن من المتلقين يشرف على كتابتها الكُتاب الثوريين وشباب المدونين والصحفيين ، وتكون الجريدة مطبوعة ومنشورة على الانترنت

ب- منشورات ذات محتوى ثوري توزع في المناطق ذات الكثافة الديموغرافية العالية وبالاخص المناطق المكتظة بالمهمشين ويتم ذلك عن طريق كوادر من الشباب الثوري التابع لجبهة الدعم ، وايضاً عن طريق منافذ بيع الجرائد وممكن توزيعها مع الجرائد الاخرى.

ملحوظه :-  يفضل توزيع الجريده مجاناً او بملبغ رمزي لضمان اكبر كم من الانتشار .

رابعاً: الاعلام الالكتروني :-

تقوم هذه الفكره على عدة مهام تتلخص في الآتي :-

اولاً : اقتطاع مقاطع مؤثره من البرامج والرسائل التلفزيونيه ونشرها على الانترنت

ثانياً : المقالات والاراء المنشورة والمنشورات يتم نشرها بنفس اسلوب الطريقة السابقة .

ثالثاً : تشكيل جبهة دفاع لمواجهة انصار الجبهة المضادة عن طريق التعليقات وحذف التعليقات غير اللائقه والآراء المضاده المؤيده للنظام السابق .

رابعاً : نشر صور واعمال جبهة الدعاية والاعلان.

المحور الثاني :- الدعاية والإعلان Propaganda 

-بعض النماذج لملصقات ثورية

تقوم فكرة هذه الجبهة للتعبير عن الثورة اعلانياً وفقاً لمعايير الاعلام السياسي وللترويج للفكر الثوري عن طريق اساليب الدعاية والاعلان السياسي ويكون ذلك عن طريق تصميم حملات اعلانية متكامله واغاني مصورة ورسومات جرافيتي وجداريات عن طريق تشكيل مجموعة فرق على النحو التالي :-

اولاً فريق للتسويق الثوري :-

تكون مهمة هذا الفريق هي صياغة اساليب تسويقيه وترويجيه مبتكره تتعامل مع الفكر الثوري وكأنه سلعه يجب اقناع جمهور المتلقين بها ، ودراسة اطياف الشعب وتقسيمهم الى شرائح عمريه ومجتمعيه وتحديد نوع الخطاب السياسي لكل فئة بهدف اقناعهم على الانضمام الي المد الثوري

ثانياً : فريق المصممين :-

وهو يتكون من فريق عمل ضخم من مصممي الجرافيك والمطبوعات و الاعلان والرسامين والمصوريين والمخرجين والمونتيرين تكون مهمتهم كالتالي :

1- تصميم اعلانات و برموهات تلفزيونيه

2- تصميم اعلانات مطبوعه ( اعلانات طرق - حوائط - جرائد - انترنت ...الخ )

3- العمل على وحدة التصميم في جميع الوسائل الاعلاميه السابق ذكرها في جبهة الاعلام .

4- العمل على اخراج مجموعة من الافلام للتسويق للفكر الثوري والتي تظهر بطولات وتضحيات الثوار في خلال فترة الاسبوع الاول من الثورة

5- العمل على تصميم مجموعة من الاعلانات التفاعليه تهدف الى خلق حالة من التجاوب بين المتلقي والفكره

ثالثاً : فريق الفنانين الثوريين :

وتكون مهمة هذا الفريق هي صياغة وعمل اعمال فنيه روائيه وغنائيه ثوريه واغاني حماسية يتولى فريق المصممين اخراجها مرئياً ، وايضاً القيام بعمل مجموعة اغاني ثورية على طريقة المارشات او الالتراس (كورال ثوري) .

رابعاً : فريق الجرافيتي :-

يتم التنسيق بين هذا الفريق وفريق المصممين لتصميم جداريات ورسومات جرافيتي يتم تنفيذها على الحوائط والجدران في شوارع المدن وفقاً للمناطق التي سيتم اقتراحها عن طريق فريق التسويق الثوري .

المحور الثالث :- الإخبار News Broadcast

من المتفق عليه ان الاعتماد الاكبر او السبب الفعلي في لجوء المتلقي للتعرض للاعلام الحكومي هو البحث عن الخبر او المعلومه عن مجريات الامور وما يستجد من احداث ، ومن اهم اسلحة الاعلام الحكومي هو التغطيات الاخباريه وبالتالي يعتمد ويتعمد الاعلام الحكومي في تشويه صورة الثورة والثوار ودعم الثورة المضاده عن طريق برامج ونشرات الاخبار و البرامج الحوارية المتعمدة تحليل الاخبار والاحداث وفق منظور معين يهدف الى تشويه الثورة وتقويض ركيزتها الاساسية وهي التأييد الشعبي .

ومن هنا يجب ايجاد شبكة اخباريه متكامله من المراسلين الاخباريين بشكل مفعل وفائق التنظيم وواسع الانتشار لنقل الاخبار من قلب الاحداث عن طريق استخدام التكنولوجيا المحمولة - Mobile Technology   مدعمين بفريق من مهندسي الاتصالات والدعم الفني لنقل وعرض الاحداث بسرعة وعلى حقيقتها ونقل صورة حية وبثها عن طريق جبهة الاعلام على الوسائل التابعة لها مما سوف يشكل مصداقية كبيرة مع الاخص بوجود صور حية من قلب الاحداث والقيام باستديوهات تحليلة على مدار الساعة لعرض وجهة النظر الثورية للحدث و سوف تمثل هذه الجبهة المصدر الرئيسي للمعلومات لباقي وسائل الاعلام الثوري.

التوعية والإرشاد     Public Awareness

تقوم هذه الجبهة على توظيف كوادر تعمل بالتنسيق مع فريق التسويق الثوري بعمل حملات توعية سياسية للجمهور في الشوارع والميادين عن طريق :-

1- مؤتمرات جماهيريه

2- مقابلات شخصية

3- منشورات توعية توزع باليد في اماكن التجمعات الكبيره (بالتنسيق مع فريق المصممين وجبهة الاعلام المقروء )

4- حملات توعية وندوات داخل الجامعات والمراكز الثقافية

5- تنظيم مسيرات جماهيريه لشباب ومارشات للالتراس الثوري - بالتنسيق مع فريقي التصميم وجبهة الاعلام المقروء- وتوزيع منشورات ومطبوعات على الجمهور في الاماكن التي تكون بها هذه المسيرات .

6- تشكيل فرق للتواصل السريع لدعم وتأييد الاضرابات والتواصل الفوري معهم لتسييس وتوحيد المطالب التي تتوافق مع مطالب الثورة

المحور الخامس: الدعم   Support & Resources

من المؤكد ان كيان بهذا الحجم الذي نطمح اليه سيحتاج الي كم هائل وضخم من الدعم على ثلاثة محاور رئيسية  :-

اولاً : الدعم المالي :

وهو يتكون من فريق عملي مالي  مسئول عن توفير الموارد المادية والمالية للجبهات السالفة الذكر في تكوين جبهة الاعلام الثوري ويتم ذلك عن طريق جمع التبرعات والاكتتاب العام والجهود الذاتية .

ثانياً : الدعم اللوجيستي :

وهو فريق من المتخصصين يكون مسئولاً عن توفير المعدات اللازمة لكل جبهة مع توفير اماكن الاجتماعات ووسائل التنقل لجماعات الالتراس الثوري وتدعيم الاعتصامات للحركات الثورية وتدبير سرعة التنقل لاعضاء جبهة الاخبار

 ثالثاً : الدعم البشري

وهو الفريق المسئول عن توزيع الكوادر البشريه على الجبهات السالفة الزكر وعملية التنسيق بين الفرق والجبهات الثورية وعملية تجنيد اعضاء الالتراس الثوري

رابعاً: الالتراس الثوري :

وهي مجموعات شبابيه منظمه وفق تسلسل هرمي تقوم بعمل مسيرات ومارشات في الشوارع والميادين بالتنسيق مع باقي الجبهات وترتدي زياً موحداً يقوم فريق المصممين بتصميمه ويقوم فريق الفنانين الثوريين بعمل اغاني خاصة بهم .

المحور السادس: الجبهة الالكترونية Cyber Frontier

وتعد هذه الجبهة من اخطر الجبهات على الاطلاق وهي الجبهة المنوط بها عدة مهام دقيقة للغاية :

اولاً : الدعم الفني وتأمين الاتصال لجبهة الاخبار والاعلام

ثانياً: توفير الكوادر للعمل داخل الفروع الالكترونيه داخل الجبهات

ثالثاً : توفير موقع خاص للتواصل داخل جبهة الاعلام الثوري

رابعاً : تنظيم جبهة للعمل على غلق الصفحات والمواقع المسيئة للثورة والتي تدعم الثورة المضاده

خامساً :تشكيل جبهة للحرب الالكترونية

وهكذا يكون انتهى تصوري لهذه الجبهة للاعلام الثوري و هو ليس تصوراً نهائياً و قابل للتطوير وفقاً للحاجة ومطروحاً للنقاش والتحسين والنقد الموضوعي

امضاء 

PYROVISKY 

SAW 25 يناير ....افرم يا فرغلي

TAHRIR CHAINSAW MASSACRE 

انا المره دي مش حاتكلم على نظريات انا المره دي حاتكلم على نظريتي لسيناريو المفرمه الي حاسس انو العسكر بيجهزوها طبعاً الكل فاكر انو سيناريو 54 حايتكرر تاني بنفس حذافيروا انا شايف كده برضوا بس بأسلوب جديد مع اختلاف انو ترتيب الناس الي حاتتفرم حايكون مختلف المرده دي عن المره الي فاتت 

(ترتيب 54 : فرم الملكيين ، المعارضه ، الاحزاب ، النخبه ، الاسلاميين ، الاصوات المستقله من الشعب )

وطبعاً ده تم في ظل نظام قمعي صميم من المخابرات والبوليس السياسي تحت اشراف العسكر والحجج كانت جاهزه التآمر على الشعب ومكتسباته (مكانش لسه سموها ثوره ) المره دي انا شايف العكس 

اولاً : عاوز اختي ...عاوز فين

بعد ما اندب الشقاق بينا وبين بعضنا والسواد الاعظم من الشباب بقى مش طايق سيرة الاسلاميين ولا الاخوان لمجموعة المواقف المخزيه ليهم تجاه العسكر والثوره ودول سيناريوهات الفتن الطائفيه والمجموعات المسلحه التي تسعى لقلب نظام الحكم وفرض السيطره على المواطنين الشرفاء موجوده بالزوفه والحركتين بتوع سينا كانو اكبر دليل على كده عمليتين ارهابيتين على تفجير على حادثة قديسين تاني هوووووووب افرم يا جدع العيال دي  وسلملنا بقى على الصناديق وانت ماشي

ثانياً : النخبه ....هاي حمزاوي

النخبه بقى دول اصلاً شوية الكتاب السكه والمفكرين النص لبه الي ربنا بلانا بيهم قبل وبعد الثوره دول بقى لببهم سهل حادثه زي بتاعت بسمه وحمزاوي على حته زي بتاعت الشوبكي على ترب من تربات صوت الامه على قرار للقنوات من جهه سياديه مجهوله انو الرجاله دي ماتطلعش يبقى فل كده واتعشت ولو حد بمبك يقعدوه جنب مايكل نبيل ولا يبعتوه مع الي قبلوا يدور على اختو 

ثالثاً : الاحزاب ....سيد سرنجه واعوانه 

طبعاً الجماعه دول زي الفل وعايشين في بعد موازي لكوكب الارض وطبعاً دول مش حايخدوا غلوه في ايد العسكر زي المره الي فاتت و يخرجوا من تحت ايدهم بعد اما وراهم الفار ابو سنه دهب في مصنع الكراسي وشربهم شاي في جروبي وسط البلد وقالولوا "هتكوا عرضي يا مولانا ...احمد ربنا غيرك نفسوا فيها من زمان" والبراعم تحت 80 سنه دول بيرضوا بقليلهم يعني هما كلهم على بعض كده لو قالولهم تاخدوا ربع البرلمان حايوافقوا احسن من مافيش ويطلعوا حاملين في الوثيقه (الورقه العرفي اياها ) ويقولوا ده ميثاق شرف اصل شرف الاحزابجيه زي حجر الولاعه لابد من لاطّه 

رابعاً : الشباب والحركات الشبابيه 

دول بقى حكايتهم حكايه يعني الرجاله مش حاينفع معاها الكلام الجامد ده علشان الناس الي بره ماتقفش ويلاقوا مفروض عليهم عقوبات دوليه و السبوبه والمعونه تتوقف ويلاقوه نفسهم بدل ما بيعملوا مصالح من ورا الغاز والبترول واليغمه كلها في جيبهم بيدبئو القرشين علشان يأكلوا الناس بدل ماتكلهم  ونلاقي كل ثروات البلد بتتباع بره مقابل الغذاء زي العراق كده ونروح في سكة الصومال ..

حايقوموا لمينلك الرموز ملفقينلها شوية قضايا من بتوع التمويل الخارجي وارمي يا جدع فالسجن الحربي و شويه تانيين حايظبطوهم اشي حوادث عربيات على طرق سريعه واشي مختل داخل يسرق موبايل و 200 جنيه واشي مجهولين بيتبادلوا اطلاق النار فخد رصاصه طائشه على فيلمين من بتوع دينا وحسام ابو الفتوح على شوية حركات يبقى سلامو عليكوا فالعيال ...طب والباقي ؟؟ حايسبلكوا قهوة البورصه و والي حايبمبك حايحصل اخواتو ونرجع لايام التشفير والمايلنج ليستس والاسامي الوهميه والكلام بالسييم والمنشورات الي بتتوزع فالخباثه في وسط البلد والجامعه ويقوموا بقى مطلعينلنا الشباب الطاهر بتاع 25 يناير الي روح يوم 25 يناير برضوا وطبعاً دي فئه مزيفه ومش موجوده ومحصلتش ده صنف مازوخي جديد ظهر بيدعى انو شارك فالثوره من اول لحظه لأخرها بس دلوقتي مؤيد للعسكر وبيقف مع بتوع احنا اسفين يا ريس في روكسي و بيعاني من تسلخات فكريه شديده والتهابات عقليه مزمنه مع رغبه شديده في ممارسة الجنس الفموي لأي حاجه لابسه ميري المهم الاشكال الوسخه دي حايطلقوها علينا فالقنوات والفضائيات والجرايد والنت تعرص للعسكر ومش بعيد يبعتوهملنا على البيوت كمان زي مناديب الصابون السائل 

طبعاً سؤال واحد حايسألوا : وهما حايستفيدوا ايه من ده كله ؟؟ اسأل الحاجه

الهدف هو افراغ المناخ السياسي في مصر من اي عوائق او معارضه حقيقيه قادره على الحشد لاعادة بناء النظام القديم وتقويته معد اما تهالك بسبب الثوره والضربات التقيله الي اخدها ثانياً انو لما مبارك ياخد براءه هو وعيالوا والعادلي والي معاه يبقى مافيش حد يقدر يعترض على حاجه ويبقى الثوره حاجه كخه والي يحب مصر مايخربش مصر ويالا نبني بلدنا والجيش والشعب ايد واحده في حته حساسه 

ملحوظه : دي تخيلي للمفرمه الي جايه ممكن ماتحصلش بالطريقه دي او ممكن ماتحصلش اصلاً بس لو فضلتو مخرئيين كده احتمال كبير تحصل 

وعقلكو في راسكو تبتوا عليه لا يتنشل منكو

المحرض الاعظم 

الاكس الكبير

Pyrovisky

Action فلسفه فارغه ( النظريه الستالونيه للهجوم الخاطف ) اكشن

طبعاً السواد الاعظم منكو فاكر اعتصام 8 يوليو رغم سلبياتو الكتير و فاكرين طبعاً موقعة العباسيه والمواطنين الشرفاء ( ولود الزانيه ...ولود!!!!! عديها ) الي مسكو العيال شلفولهم وحطو عليهم حطه منيله عباسي (عباسي وعباسيه مالهومش علاقه ببعض ) واستشهد واحد واتصاب ناس كتير وطبعاً اتكرر الموقف ده النهارده بعدد اقل وده اكدلي شوية حاجات مهمه جداً اولها انو في ناس ما بتتعلمش من اخطائها (يعني يا احف انت وهو مسيره كان فيها 13 الف وفشلت حاتيجي بعدها ب شهرين تقلدها بعدد اقل مايجيش ربع المسيره الاولانيه وحتنجح ) تاني شئ انو المسيره الي كان بيقودها مجموعه اقل ما يوصفو بيه انهم جاهلين بجغرافية القاهره ( طالما مصر على فكرة المسيره علشان المسيرات بتلم ناس وبتكبر يبقى وانت بتحط خط سيرها تعتمد على التوزيع الديموغرافي للمناطق الي مليانه كثافه سكانيه من الطبقات الكادحه الي احنا حاطيين نفسنا في وش الطوفان علشانهم  ) يعني مثلاً بدل ماتخرج من التحرير لشارع رمسيس لحد اما توصل للعباسيه فمسيره ممكن تقرص على نفسك شويه وتمشي من التحرير لعابدين للسيده زينب لشارع بورسعيد لباب الخلق للجماليه لباب الشعريه للضاهر لاحمد سعيد لعبدو باشا لصلاح سالم لشارع الطيران - الي فيه مقر وزاره الدفاع- بس انا جيت سألت نفسي سؤال هو ليه احنا مصريين على التحرير التحرير كان في ايام ل 18 يوم مركز المواجهات والمعارك وبقى رمز بس التحرير من غير مواجهات ومعارك زيو زي اي مكان في مصر خاصة انهم فيستخبوا و يسبونا نعمل الي احنا عاوزينو لحد اما نزهق يبقى الحل فين ؟؟؟؟؟؟؟؟؟ فالمواجهه طب ازي وهما بينسحبوا من كل الاماكن الي فيها مظاهرات ويوم 9/9 كان اوضح مثال على ده يبقى نعود لفكرة الهجوم الخاطف يعني ايه يعني الدعوه للمليونيه تبقى مش فالتحرير تبقى في مكان حيوي يمثل ضغط كبير و ضربه رهيبه تقسم الوسط ( يعني مثلاً لو شوية عيال مجانين اقتحموا مجلس الشعب واعلنو سقوط شرعية المجلس وانو الحكم للشعب وبداية تشكيل مجلس انتقالي لقيادة الثوره او المعلمين القرفانين يقتحموا الوزاره ويعزلو الزير بالقوه واعلان  انهم هما الي حاينتخبوا وزير منهم وطبعاً كل ده ضربات توجع يمكن تشل السلطه عن التصرف ) والضربات دي كلها حاتأكد على رساله مهمه جداً وهي ان الثوره تستطيع ان تنتهج ايقاع اعنف مع الحفاظ على السلميه ( قبل ما حد يتفلسف هناك فرق شاسع بين الايقاع العنيف للسلميه والعنف الموجهه والكفاح المسلح والحركات الثوريه المسلحه ) والي بيمثل تهديد واضح وصريح لانتهاج القوه في تحقيق المطالب الثوريه والفكره دي محتاجه اولاً توحيد جبهة القياده ( محدش يسميها ائتلاف علشان بتشائم) وتكون جبهه منظمه بمتحدث رسمي واحد وفي حالة انتهاج المبداء ده كل العناصر القياديه مش حاتتعامل مع اي اتصالات من السلطه والمطالب حاتكون غير قابله للنقاش والتفاوض... ولازم يكون في عناصر وكوادر اساسيه بتمثل قادة على الارض والهجمات الخاطفه بتكون مفاجئه مش علنين عنها على النت والتلفزيون وعاملين هيصه وزمبليطه وصداع 
واهم حاجه الفلول الي بيعملوا تجمعات زي بتوع احنا اسفين ياريس المفروض يتطبق عليهم هجوم خاطف علشان يعيشو جو المعارك شويه ويشوفو لمحه من الي شافوه الثوار في السنين الي فاتت ونشوف اذا كانو اصحاب مبداء ولا اصحاب مصالح المهم التصعيد لازم يكون فعال وجديد ومش متعودين عليه ولا حاسبين حسابو لانو في الكام شهر الي فاتو احنا تأكدنا من انو التحرير خلاص كارت اتحرق والاعتصام اصبح غير مجدي وعقلكو في راسكو تبتوا عليه لا يتنشل منكو
المحرض الاعظم 
الاكس الكبير
Pyrovisky

#mozeteltahrir +twitter

في يوم مش من بعيد ضربني الشوق قوي و جامد و بصوره جنونيه للبت مزة التحرير ..وبما اني خايبان و عبيط و اهبل قعدت انوح على تويتر و عملتلها الهاشتاج #mozeteltahrir و طبعاً علشان التويتات بتروح بعد فتره و التاج بيعطل بعد اسبوع طلع عيني من وسط 4 الاف تويته و قولت احفظهم فالبوست ده ...إنجوي :

إلهي ..يا جامع الناس الى يوم لا ريب فيه إجمعني بضالتي

إلهي ..ضرم السعير في فؤادي ودميت يداي من الطرق على ابواب رحمتك ..أهل من مجيب ..اهل من لقاء ..أهل من كلمه

إلهي ..زاغ البصر وإهترئ الفؤاد وضاقت النفس بما فيها من لوعة أفلا يغرب شراح الفرح ناحيتي يأتيني بمن يرد على الحياة

إلهي .. بحق ديم محمد رد إلى آسري فقد سلبني الفؤاد واليقين فقد هرم القلب وصحنت جبال الصبر وجرعتها فنظر بعين الرحمة الى عبدك

إلهي ..يا ويحي حين جائت معذبتي في غيام الغسق كأنها الكوكب الدري فالافق ..يا خير سائرة اما خشيت من الحراس في الطرق

إلهي يا ملك الملوك أقل عثاري فإني عنك أنأتني الذنوب وأمرضني الهوى لهوان حظي ولكن ليس لي سواها طبيب

غرق طيفك بدموعي يجفف الدموع الطيف ..اظلمت الدنيا ولم سوى طيفك سراجاً أزين بالحزن سنيني وانتظر انا و طيفك لقياك

إلهي انت تعلم كيف حالي فهل يا سيدي فرج قريب في ديان يوم الدين فرج هموماً في الفؤاد لها دبيب 

إلهي قد كتب علي الشقاء وضاقت كل حلقاتها أهل من مفرج عن مافي الفؤاد من كرب وبلاء أسعيرين قدري أم نحشر معاً في يوم عظيم

إلهي ضرعت وبكيت وابتهلت إليك أن تجمعني بضالتي فأجبني أو أجرني عسى ان ينصلح حال قلباً وعبداً

إلهي ..فإن كان اللقاء فالدنيا لا خير منه فجمعنا في يوم عظيم لا يبقى فيه سوى وجهك الكريم

همت على وجهي شهوراً فالميدان أحث عنك ولم اجدك في الطرقات ولا الوجوه ويبست انهار الامل في لقياك فأبتهلت هنا عسى يأتي يوماً تعلمين فيه انه كان هناك من يتضرع الى الله ان يراك مرة واحدة قبل الفناء

(فلسفه فارغه ...النظريه الجوبلزيه للتسويق الثوري (ثوره يابيه......على كام؟؟؟( الجزء الاول

خرجنا كلنا كشباب و شعب من يوم 25 ولينا مطلب واحد " الشعب يريد اسقاط النظام" واشتغلت علينا الآله الاعلاميه الضخمه بشكل مبالغ فيه في مصر سواء كانت حكوميه رسميه او حكوميه غير رسميه (متسألش كتير خد الكلمه وانت ساكت) او خاصه بس ماشيه بمبداء صبيان الحفافين والمطبلاتيه والي بيشوبشو ورا العوالم " دول اجندات خارجيه ..دول مأجورين ..دول تحالف القوى المعاديه ..دول عملاء ..دول عناصر إثاريه (الي امنية حياتي اعرف الاثاري ده يبقى ايه و سبب من اسباب اني منسحبتش من الميدان يوم 28 يناير انو التلفزيون قال في هجوم ايثاريين على الميدان حيحصل  كمان شويه واترزعت فيها 18 يوم مستني ام الايثاري ده ) دول عناصر خارجيه متأمره على مصر من ال سي اي ايه +حماس+ الموساد+ايران+افغان+ القاعده (ولو اميتاب باتشان كان فيه شوية صحه كانو حطوه معاهم ) اي حاجه غير اننا مصريين وزهقنا من الذل و القهر و الفساد والهوان والمرض والجهل والفقر  وكأننا كنا عايشين في نعمه وجنة والدنيا كلها حاسدانا عليها ( على ايه يا حسره  ايش ياخد الريح من البلاط ) وكان الشغل الشاغل ليهم تشويه صورتنا باي شكل من ااشكال من اول العماله والخيانه لحد الشذوذ الجنسي والفسق والتفسخ الاخلاقي ، المهم مهمناش و ربنان نصرنا و الباقي انتو عارفينو ( طب يبقى جاي تصدع دماغ الي خلفونا ليه بقى هي ناقصاك...انت ياد انا مش قلتلك تقعد ساكت) مربط الفرس انو نفس نغمة قبل الثوره واولها بترجع دلوقتي بس واحده واحده (منكو لله خربتوا البلد..هما الي فالتحرير دول عاوزين ايه تاني ..هما مش هيهمدوا الا اما البلد تخرب ...آدي الثوره بتاعتكو والي خدناه منها...حرام عليكو احنا عاوزين امان..البلطجيه طايحين فالبلد وانتو قاعدين هنا )وكأن كل مشاكل مصر سببها ال1/100 من تعداد مصر الي قاعد فالتحرير مستني يرجع للبلد الكرامه والعزه والحق  المسلوب في ابسط حقوق الانسانيه والحياه، المهم يا سيدي ابتدا الفار يلعب في عبي  والسؤال يطلع في نافوخي هو ايه الي حصل ولا هما كلهم كانو كده من الاول بس مكوناش واخدين بالنا ومعقوله يبقى في كده بعد الثوره ( هو في ثوره اصلاً ؟؟؟؟...نعم ياروح امك..)

سؤال عجيب ومستفز بس فيه وجهة نظر برضك هو ايه الي حصل خلاهم يسألو نفسهم اذا كان دي ثوره اصلاً ولا لأ وبعد فحص وتمحيص وتقفيش ( محدش يفهمني غلط ..العب يا فرغلي..اخرس يااد قولتلك )وجدت اننا غلطنا مجموعة غلطات جسيمه  نلخصها فالآتي :

اننا تركنا الآله الإعلاميه بكل مشملاتها هي الي تعبر عن الثوره بنفس الاشخاص الي كانو ضدها فالمتلقى محسش انو فيه ثوره 

اننا سيبنا مجموعه من الناس  تختزل الثوره في مجموعه من القيم الاخلاقيه وهمشت الدور السياسي  ليها

تفريغ الشحنه الايجابيه الي ابتدت تتكون عند الاغلبيه الصامته ( الكنبويه ) في حملات تنظيف الشوارع و دهان الرصيف و كاننا عملنا الثوره علشان نساعد صناعة البويات

الرجوع لمرحلة التفرد و التوحد السياسي و خرجنا من الميدان كل واحد على انتمائه السياسي للتيار الي هو تبعه 

عدم نشر صور وفظائع الداخليه والبلطجيه والاكتفاء بصور الشهداء و هما حلوين و زي القمر مش وهما سايحين في دمهم و مهروسين تحت المصفحات

عدم صياغة ايدولوجيه ثوريه و خطاب اعلامي يضمن بقاء (الكنبويه ) في موقف المؤيد للثوره او على الاقل ماخدوش موقف عدائي

طب والحل ( وهي ليها حل بعد ماسودتها في وشنا بالمنظر ده....لو اتكلمت تاني ياد حجيب سيرة امك بالغلط) 

الحل يكمن في نظريه جديده من نظريات الفلسفه الفرغه بتوعي الا وهي : تسويق الثوره ......ثوره ياهانم ,ثوره يا بيه ...على كام؟؟( اتفلسف على الي خلفونا بقى...ادهن كريم ياللا) اينعم ..تسويق الثوره 

ودي حنسوقها ازاي بقى اكيد مش حانزلهالكو في اوفر في كارفور اشتريها و تاخد عليها مكنسه..تسويق ثوره يعني تسويق فكر و ده مش اي فكر ده فكر سياسي ثوري ( يعني البوليس حيطب امتى ؟؟  ) يعني بكل بساطه عملية اتصال اعلاني سياسي (يعني ايه؟؟...اقفل بؤك ياللا الشراب بان )

يعني ايه " النشاط السياسي الموجه الذي يقوم به الساسه او الاعلاميون او افراد الشعب والذي يعكس اهدافاً سياسية محدده تتعلق بقضايا البيئة السياسية وتؤثر في الحكومه او الرأي العام أو الحياة الخاصة للافراد والشعوب من خلال وسائل الاتصال المتعدده"

(معناتو ايه الكلام ده ؟؟ انا اخلص منو تطلعلي انت) نفهم من كده انو لازم يكون في نشاط سياسي بيقوم بيه افراد من الشعب بعيداً عن المسميات لاهداف سياسيه محدده عن طريق وسائل الاتصال المختلفه (بس كده يا بيه ...لسه يا احف) المسأله لسه ليها عناصر تقوم عليها عملية الاتصال السياسي الاعلاني 

1-النشاط السياسي: وهو مضمون العمليه الاتصاليه السياسيه

2-القائم بالاتصال : وهم الساسه او مصمموا الأعلان السياسي .

3-الهدف : الذي يتضمن الاثر المنشود من الرساله سواء كان متعلقاً بوظيفة التأثير في الرأي العام او التأثير على فئة معينه من الجمهور  للحصول على نتيجه ايجابيه .

4-الوسيله : وهي كل وسيلة اتصال تجسد النشاط السياسي الذي يجسده المصمم من خلال السياق التصميمي للاعلان.

( لخص يا نجم مش فاهمين حاجه ..اخرس ياد يابن المشنوقه ) 

طب ده حلو قوي الكلام ده نسنجفو ازاي على الثوره (شايف ياد كلام الناس الكمل ) اقولك يا سيدي 

لازم اولاً ايجاد مجموعه من المفاهيم او هدف معين محدد للعمليه نفسها

تاني حاجه الاتفاق على كيان يكون مسؤل عن العمليه دي من بابها

تالت حاجه الاتفاق على الهدف النهائي للعمليه دي من بابها كده

نيجي بقى للمعضله الرئيسيه ....الوسيله ....علشان نقدر نعمل الي فات ده كله لازم نستخدم كل الوسائل المتاحه بس الي في نفس الوقت بتوصل للمتلقى ( يعني مش الفيس بوك و تويتر يا امور انت وهو واظن كلامي واضح ولو اسغبيت حأفإفلك) اولاً هو مين المتلقى بتاعنا (ودي عاوزه سؤال ...الشعب طبعاً ) كويس الشعب ده طبقات وكل طبقه ليها اسلوب حياه مختلف وبالتالي طريقة خطاب مختلفه (مانت كنت ماشي كويس حتعقدها تاني ليه...، اخرس ياللا يا جعر انت )  يعني الشاب الي بيشغل في محل غير موظف الحكومه غير موظف البورصه غير دكتور الجامعه غير المهندس غير رجل الاعمال (مممممم نظريه برضه ) يبقى لازم يكون عندنا وسائل توصل للكل وانا ارشح الآتي

1- شبكه اخباريه ليها مصداقيه كبيره ترفع مبداء الحقيقه اولاً مهما كان الثمن ، تنقل اخبار الثوار في كل مكان في مصر وتعملهم شرده على كل حاجه بيعملوها

2- محطه اذاعيه ثوريه تجذب الناس والشباب في مصر كلها ليها و اعتبارها هي صوت الثوره الوحيد 

3- بوسترات في كل حته وعلى اماكن مميزه داخل المدن برسائل متغيره لضمان استمرار التاثير 

4- تفعيل مجموعه من البرامج الحواريه بصوره مكثفة للتعبير الفكر الثوري

5- تصميم حمله اعلانيه طويلة المدى لتوجيه الرأي العام لصالح الثوره

وبالتالي ينتهي هنا الجزء الاول و في الاجزاء التاليه حنستفيض اكثر في شرح ازاي نصمم حمله إعلانيه سياسيه 

امضاء 

المحرض الاعظم

الاكس الكبير

PYROVISKY

: (فلسفه فارغه:" النظريه الاشراكيه التصعيديه للتحريض ( التحطيب السياسي"

تهدف هذه النظريه الى توحيد الصفوف والاتجاهات نحو تصعيد الاحتجاجات السلميه الى حالة العصيان المدني 

حينما اتجه بعض الثوار الى غلق مجمع التحرير بالقوه (والله اعلم بالنوايا ) استهجنت انا وغيري كثر (حلوه استهجنت دي )هذا التصرف الغير منظم والغير متفق عليه وفي مناقشه بيزنطيه اليكترونيه(ام الكلام المجعلص بتاعك يا اخي ) مع احد المسؤلين عن هذا التصرف كانت الردود تتلخص كالاتي

الرد الاول :متدنيش اوامر وانت قاعد في بتكو فالتكييف والمروحه وسايبنا نتشوي فالشمس والحر 

(طبعاً رديت وقلت انا فالصينيه وزي زيك ولو مضايق من الشمس والحر يا امور مكنتش اعتصمت فالصيف والمفروض قبل ماتعمل تصرف زي ده على الاقل افتح نقاش فيه مع باقي القوى السياسيه الي موجوده فالاعتصام زيها زيك )

الرد التاني: بلاش فلسفه فارغه احنا والحمد لله بنعرف نخطط و نفكر كويس قوي والعبره بالنهايه والعصيان المدني حنعلنو قريب قوي 

(طبعاً كان ردي برضه مهزب و قولت للشخصيه انو مافيش عصيان مدني بيجي بالعافيه و اننا كده بنخسر الشارع وفكرتوا اننا يوم 25 و 28 كنا بننادي و نقول يا اهالينا انضموا لينا مكناش بنجبر حد على حاجه وقدرنا نكسب تعاطف الناس وبالتالي قدرنا نكسب الشارع ولحد دلوقتي انا مسمعتش منك مبرر منطقي غير انو سيادتك حران و مأفئف من الشمس والحر و عينت نفسك وصي على الشعب تؤمر و الكل لازم يسمع كلامك )

الرد التالت : انا ماليش نفس ارد عليك 

(طبعاً كان ردي مهزب برضه بس مقدرش اقولوا هنا علشان في بنات ممكن تقرا التدوينه دي)

ومن هنا جت نظرية الفلسفه الفارغه وسميتها (((النظريه الاشراكيه التصعيديه للتحريض)))) بين قوسين ( التحطيب السياسي ) الي الهدف منها خلق حاله من التوافق الشعبي على التصعيد اولاً او على الاقل التعاطف معاه

وده نقدر نلخصه في اننا لازم نقنع الناس بالعصيان المدني( انت ياد عبيط ياد حنقنع الناس ازاي والاعلام كله بيهاجمنا...وهو من امتى مكانش بيهاجمنا يا احف انت وهو ) وكان لازم ندور على طريقه جديده ومبتكره....وفجأتن لقيتها التحريض ( دششششششششششششش "مؤثرات صوتيه ") 

دلوقتي احنا محتاجين نتقمص اهم صفه الاعلام بيحاول يوصمنا بيها من زمان اننا محرضين لازم كلنا نبقى محرضين بس بنظام

اولاً المرحله الاولى (النضال السعدي الوفدي لمكافحة الامبرياليه ):

 لازم يكون عندنا كاتب ثوري قراري ابن حنت يكتبلنا كام منشور يهيج الدنيا و يبين للموظفين والعمال انهم كلوا على قفاهم وان الحكومه باعتلهم الترماي و شربتهم مغرز وحتغلي السلع والبنزين ومش حتزود المرتبات علشان يفضلوا شحاتين ومش لاقيين والاغنيا يتحكموا فيهم اكتر

تاني حاجه كام منشور عن مدى حماية المجلس العسكري للنظام البائد و الصفقات الي اتعملت وكلها ضد الثوره علشان يحموا رموز الفساد و منعرفشي ناخد فلوسنا منهم

طبعاً واحد فيكو حيقولي ماحنا عارفين الكلام دوان  (قعد ساكت ياد لحد اما اخلص كلامي ) المنشورات دي لازم نوزعها على الموظفين والعمال وهما داخلين اشغالهم و ياريت الي يوزعهم يبقو بنات شيك من القطائيط بتوع ال ايه يو سي بابتسامه حلوه علشان ياخد المنشور اصلاً (طبعاً احنا لو بعتنا خناشير ولا حريم مصديه حيفتكروهم بيشحتو و يقولهم الله يسهلك ولا يحنن )

المرحله الثانيه : (المرحله التسويقيه التحريضيه الكبرى) بين قوسين( الاشورز) وقولوها بمياصه 

المرحله دي مهمه نتبع فيها نظرية البيع الشخصي يعني كام شاب كده على كام شابه يلبسوا و يتشيكوا و يقوموا داخلين على المصلحه او الاداره او اياً كان المكان الي حيدخلوه صباح الخير ممكن اخد من وقتك دقيقه و ياكل ودانه بقى على الموضوع و يديلو المنشور و يبينلوا هو اد ايه العصيان المدني في مصلحته  واننا عملنا الثوره علشان الغلابه وان حت بعد الثوره الحكومه مستكتره انو ظروفه تتحسن وانو يكسب الي يكفيه بالحلال وانها عاوزاه يفضل طول عمره ماكينة تصنيع فلوس للاغنياء انو في نظر الحكومه المتأمره لازم يفضل شحات علشان الاغنيا يكسبو و يتهنوا

المرحلة التالته (مرحلة المسكنه ): 

هنا بقى نجيب بقى العيال المصديه والخناشير الي مللحوا من الشمس  بشكلهم العار ده ومش كتير 50 60 واحد بالكتير يعملوا وقفة شحاته و مسكنه قدام المكان الي فيه الشباب بتوع المرحله التانيه علشان الي شاف العيال النضيفه لما يشوف دول يصعب عليه انهم يبقوا كده ولما يلاقي عددهم قليل يصعبوا عليهم اكتر و يقول يا ولداه العيال اتعدموا العافيه علشاننا و انشاء الله النخوه ساعتها تطلع وابن البلد يبان على اصله والجمله المشهوره تطلع احنا حنسيب العيال واقفه لوحدها  قدام الظلم ده كله داحنا حتى منبقاش رجاله (جواااز عتريس من فؤاده باطل )

المرحله السريه ( مصر امانه بين ايديك يا رأفت ) مرحلة ليفي كوهين

طبعاً واحد فيكو حيتفلحص ويقولي احنا حنخش المصلحه او المكان ازاي اصلاً (انت ياد عبيط ياد تفتكر يعني انها عدت عليا )

قبل المراحل دي كلها لازم نجند عميل لينا جوا المكان يدرس المكان كويس و يمدنا بالمعلومات زي ( مين القيادات الي جوا المكان ده ومين الي لو جبناه في صفنا المكان كله حيمشي ورا كلامه نقعد مع مين و منقعدش مع مين مين الثورجيه الي جوه مفاتيح شخصياتهم ايه  كل ده ( شوفت بقى يالا انها معدتش عليا ) ووقت اللزوم اول واحد يقول جواز عتريس من فؤاده باطل يكون العميل بتاعنا ....بس كده لأ يا احف منك ليه لها له 

المرحله الرابعه والاخيره (حريقه الغيطان )

طبعاً بناء على المعلومات الي حيمدنا بيها ليفي كوهين بتاعنا حنقدر نحدد انهي مكان الي نركز عليه اكتر واول اما ننجح فالمكان و بما اننا شعب اللووود قوي شبكة اللفيهات كوهينات الي احنا مجندينها ننشر الخبر في كل المصالح والاماكن التانيه الي الرجاله بتوعنا يسخنوالي فيها على الموضوع (هما يعني اجدع مننا ولا ايه داحنا نلبس طرح احسن ) زريبيوووووو كرسي فالكلوب وفي اقل ساعتين يبقى الخبر مالي البلد والفضائيات انو في بوادر عصيان مدني رجالتنا بقى تحاول تستدرج المصريين الاصلا دول للتحرير الي حنكون جاهزينلهم بكل ما تشتهي الانفس منشورات على مطبوعات على يفط على منصه كبيره تحرض فالي خلفوهم (ولو حد جاب سيرة الدستور ولا الانتخابات ولا الاخوان او مجلس الشعب حطلع تربنتين امه ) حقوقك ...عرضك ...شرفك...ولادك....ذلوك...اهانوك....سففوك التراب كده يعني 

في نفس الوقت لازم تجنيد اكبر كم ممكن من المداخلات التليفونيه على كل الفضائيات عاوزين سياح و شرده و فضيحه بجلاجل في كل حته انو الناس ابتدت تهيج على الحكومه و تنضم للثوار كده يعني ..وكمان 2 او تلاته واحد متحدث رسمي يبقى شخصيه محترمه مشلازم يكون شاب بس يبقى واجهه  ومعاه اتنين ممثلين للحركه (سموها زي ماتسموها بس بلاش ائتلاف مش ناقصين نحس احنا ) وبكده تنتهي النظريه والي عاجبو على كده عاجبو والي مش عاجبو يشد في حواجبه

امضاء 

المحرض الاعظم

الاكس الكبير 

PYROVISKY

مُزة التحرير

التاريخ 4 فبراير  الزمن الساعة 2 صباحاً
هداء الوضع نسبياً وانسحب البلطجيه من امام مدخل عبد المنعم رياض و قررت ان اخذ استراحة محارب وادخن سيجاره و بما اني فالشارع من يوم 28 فطبعاً ساجايري خلصت  فعزم عليا عب عبده ( اسطى نجار من عابدين عنده 57 سنه بس كان مسوى الهوايل فالمعركه وبيفهم فالسياسه احسن من النخبه المزيفه ) بسيجاره سوبر  خشبها قليل حبتين و كنت حاسس بوجع في كتفي من كتر الضرب و رمي الطوب كنت متعور في دماغي في تلات حتت  و الدم متجلط على وشي مخلي منظري عار الصراحه بس مكانتشي فارقه معايا الصراحه يعني مين حياخد بالو منك يا خي دانت وانت متشيك وعلى سنجة عشره مافيش بت استعنت تبصلك اصلاً  ولا حتى تلمحك وهي بترمش حتبصلك وانت متهبب كده وكمان احنا في ايه ولا في ايه المهم قعدت انا و عم عبده بندخن السوبر المعموله من خشب معتبر المره دي و بنحلم امتى حننتصر على البلطجيه و الشعب كله بنزل يحارب النظام و امتى نقول (مبارك هرب ...مبارك هرب  ) زي الراجل بتاع تونس و حسيت بحد بيقرب علينا مسكت الشومه و تبت عليها وعم عبده امن على طوبه كانت جنبه طبعاً النور كان مقطوع فالميدان فمعتمدين على نور الحرايق والكاوتش المولع الي عند المتاريس وابتدت الرؤيه توضح طلعوا بنتين جايبين ميه و اكل و يشوفوا لو في حد مصاب ولا حاجه ياخدو على المستشفى الميداني (الي كانت بتبقى حوش عماره ولا قهوه و فارشين لنا حصيرتين و ملايتين على الارض ..هههه ال مستشفى ال بس اهو الشاطره تغزل برجل حمار ) المهم قربوا علينا و واحده منهم شافتني و انا مبطوح  قالت لصاحبتها في واحد مصاب  اهو تعالي بسرعه و جم لسه حقولها انا كويس لقيتها بكل قوه وحزم  قامت مقعداني على ركبي و مسكت دماغي بتقلب فيها  زي البطيخه الشليان و قامت سالاني انت حاسس بدوخه او زغلله  قلتلها لا قامت عادله راسي لفوق و لاول مره اشوف ملامحها هي تقريباً بيضه بس المظاهرات و الجو عاملين شغل برضه وهي كانت متصابه قبل كده فعينها وارمه سيكه بشوية زرقان  و فوق حاجبها مقتوح لازقه عليه بلاستر وشعرها بني لماه ديل حصان و زي القمر بنت اللعيبه وشكلها رقيق قوي بس رسمه وش القفش علشان الوضع الي احنا فيه امال كنت عاوزها تسبلك يا احف متحاصرين فالميدان وبننضرب بطوب ومولوتوف وحديد خرده وخراطيش و قناصه مرشقين في كل حته والبت متصابه في وشها (وتعويرة الوش مافيهاش معلش ) وشايفه مناظر عار يا عيني الي مبطوح و الي متعور والي عينه بتنزف والي محروق والي جايب كرتونه لاففها على جسمه قال يعني درع واقي من الطوب والي لابس حله على دماغه احسن يتبطح والي قاطع جركن وعامله خوذه كان شكلنا مرستان الحقيقه بس الوضع كله كان سيريالي صرف حنعمل ايه ادي الله وادي حكمته المهم عدلت وشي ناحيتها و من غير كلام ابتدت تغسلي وشي ....قلبي هفهف والله و باضتلك فالقفص ياد ابتديت اركز اكتر ...باين عليها بنت ناس تجيلها كده حوالي 25 26 سنه بالكتير لبسها مبهدل من النوم على الارض بس باين انها شيك ،متفجرة الانوثه(مزه مزه يعني اووووف وتكه بنت الايه ) بس بمية راجل وميتخافشي عليها ابداً مدت ايديها و بتغسلي وشي من الدم المتجلط  الي مخلوط بغبار المعركه وحاسيت انها مش بتغسلي وشي بس دي بتغسلي ورحي من جوه بتغسلي قلبي  من سواد الذل والقهر فالمعتقل السنين الي فاتت كلها مكانتش بتنزل الدم وتراب الميدان من على وشي كانت كل لمسه من ايدها على وشي بتهد احساسي بالضعف و بتبني قوه سبعتلاف سنه جوايا كانت بتغسلي وشي  بس فالحقيقه كانت بتطهرني من احاسيس البلاده ولامبالاه الي اترسبت جوانا من معاناة غيرنا من الشعب كانت بتشيل الدم من على وشي و بتنزع كل احساس اناني جوايا  ولقيتني بقول لروحي اهي دي الواحد يديها عمره وهو راضي بقى بالذمه الملاك ده متضحيش بروحك علشان تحميها ياد ده دي والي زيها مهددين بالانقراض ياااااه هو لسه في من الصنف ده هي دي الي تربي رجاله  مصريين اصلا يفدو بلدهم ويموتوا فدا ترابها والي يلاقي واحده زي دي يعيش خدام تحت رجليها  ،مش لابسه دبله في ايدها اليمين ومش شايف ايدها الشمال اصلها ماسكه بيها الازازه بتاعت الميه فوق راسي الجرح الي قي قورتي ابتدا يبان حسيت برغرغة في عنيها (طبعاً بعد كده عرفت انو العضم كان باين و انا خدت فالجرح ده لوحده 16 غرزه ) قولتلها متخافيش ياما دقت على الراس طبول ضحكت اوووووووووووو الشمس طلعت يا جدعان ايه الغمازات دي ايه الطعامه اييييوه كده يا وديييييع ردت فيا الروح بقى هاين عليا اطلع اجري فالشوارع اطحن البلطجيه طحن بصتلي بكل حنيه و هي مكسوفه وقالتلي ملقيتش حاجه اجيبهالكو غير ازازتين ميه و وشوية بلح بس الصبح لو جالنا اكل حاجيبلوكو تاني  الله اكبر حاتيجي تاني حاتيجي تاني حاتيجي تاني قولتلها ولا يهمك خلي بالك من نفسك المهم طبعاً انا كنت ولا قادر اصلب طولي من قلة الاكل وعطشان عطش ما يتوصفش بس كنت ممثل اني جامد و برد عليها بنشفان ودت وشها الناحيه التانيه و كان باين عليها مكسوفه لسه حقولها انت اسمك ايه او انت مين وتبع حركة ايه او اعرف عنها اي معلومه اشتغلت الصفافير و كان في هجمه للبلطجيه علينا و لقيتها بتقولي بصوت قوي بلهجة امر  قوم يا بطل احمي ارضك ومدريتش بنفسي الا وانا بقفش الشومه و بصرخ "الله اكبر" و بنط من فوق المتاريس و طايح ضرب فالبلطجيه والشباب عملوا زيي واتقدمنا في ميدان عبد المنعم رياض وكان هجوم انتحاري مننا وفي لحظه بص ورايا لقيتها واقفه على المتاريس و بتحدف طوب على البلطجيه و صاحبتها وعم عبده بيحاولوا يرجعوها ورا وهي ولا هاممها وفالآخر رجعوا واحنا كملنا وانتصرنا والوضع هدي ومن ساعتها وانا مش لاقيها ولا عرفت عنها اي حاجه والوضع هدي والبلطجيه بطلوا يجولنا على الميدان والبنات رجعوا زي الاول ملونين و متماكيجين ومتكوفرين وانا قاعد بدور بقالي 6 شهور على البت مزة التحرير

اين ميداني؟؟؟

كل يوم من 8 يوليو صباحاً وحتى ساعات متأخره من الليل اذهب للميدان 
هذا الميدان وقفت وحاربت من اجل الوصول اليه يوم 28 يناير ضربنا بالقنابل المسيله للدموع والرصاص المطاطي والحي ودهسنا تحت عربات الامن المركزي حتى نصل اليه و وصلنا ودافعت عنه هو من فيه يوم الاربعاء الدامي لم اهتم بسيل قنابل المولوتوف او دفعات رصاص القناصه قتلوا اصدقائي و من لا اعرفهم امام عيني لم ارتعد و ظللت على موقفي لم اخف لكن رأحة الدماء والعرق والبارود والحرائق كانت تدفع الدماء في عروقي لاستمر فالقتال و الهجوم الانتحاري في احيان كثيره  كنت افكر في الشهادة اولاً او النصر لم اعباء باي شئ المهم الميدان.....الميدان رمز انجاز هذا الجيل واصراره وتحديه وانتصاره على كل ما هو قذر في هذا البلد و داخل انفسنا ونفوس غيرنا
لا دري ماذا حدث كنت اكذب نفسي على مدار الايام السابقه ولكن اليوم كانت الفاجعه
تبدل ....تغير ..تزيف لا اعلم كل ما اعلمه ان رائحه الدماء العطره الممزوجة برائحة العرق الطاهر ورائحة الاحتراق للمولوتوف غبار المعارك والاشتباكات اختفت وحل محلها رائحة غريبه لب و سوداني و سندويتشات كبده و تين شوكي وعرق سوس وشاي وكسكسي و كشري ومهلبيه وتمر هندي وتيشيرتات على الرصيف وبطاطا وبياع مكرونه وجبنه وبياعين نضارات شمسيه ومنصه ودي جي واغني راب وشباب بيرقص وعيال بتجري في كل حته و شحاتين وبياعين مناديل و فل وامناء شرطه في كل حته ومخبرين الاقسام قاعدين وسطينا عادي وكاميرات و حبيبه و خناقات وهيصه و طبيخ وعندما كنت اتحدث مع احد الاصدقاء وجدتني اسمع احد الباعه يقولها و بالفم المليان والنبي داحنا الي مستحملينكوا .....دهشت كيف انا قاتلت من اجل هذا وهو اليوم يمن على بان ادافع عن حقوقه في نظير تصرفات عشوائيه تهدر حقوق شعب باكمله ومشيت في الميدان متفحصاً اكثر اغلب الوجوه نعرفها حاربنا و قاتلنا و بكينا و نزفنا سوياً 
فإذا كان الثوار كما هم و المكان هو نفس المكان فلماذا لا جد ميداني ؟؟؟؟؟؟

اتاريني كنت غلطان

اتاريني كنت غلطان

ام انا كنت مغفل بجد....ومغفل دي كمان قليله عليا

كنت غلطان ...كنت غلطان لما خرجت في مظاهرات 2000 لما الصهاينه كانوا بيدكوا غزه ساعة الانتفاضه التانيه وقتلوا الشهيد محمد الدره و احنا هيجنا الدنيا اغاني و مظاهرات واترميت في امن الدوله فيها شهرين ودي اول مره اخش فيها المكان ده 

كنت غلطان .....كنت غلطان لما سمعت في 2003 انو القناه بتاعتنا مفتوحه للسفن الامريكيه و حاملات الطائرات تعدي علشان تضرب العراق فخرجت في مظاهرات انا والي زيي قدام مجلس الشعب اتبهدلنا و اتضربنا و رمونا برضه في امن الدوله يجي شهرين برضه

كنت غلطان ....كنت غلطان لما طلعت من المعتقل قومت عامل معرض عن انتهاك حقوق الانسان في فلسطين وعملت لوح عن انتهاك حقوق الانسان في مصر فاترميت في المعتقل 4 شهور تاني وجابولي لوحي كلها حتى شغل الكليه و حرقوه قصاد عيني ولما بمبكت كسرولي دراعي علشان مرسمش تاني بس الحمد لله بعرف ارسم باليمين برضه(انا اصلاً اشول )

كنت غلطان ....كنت غلطان لما نزلت اقول لأ للتعديلات الدستوريه بتاعت 2005 واتضربت و اتسحلت قدام دار القضاء العالي وخدتلي اسبوعين تايم شير في لاظوغلي وخرجت على المظاهرات بتاعة كفايه و ضربونا تاني و سحلونا تاني ومهمناش

كنت غلطان ...كنت غلطان لما نزلت ارفض اعادة ترشيح مبارك واقول الانتخابات بتتزور و شوفت الصحفيات بتوع امن الدوله بيقلعوهم هدومهم فالشارع و بيهتكو عرضهم  وحاولت  تحمي الستات بس البلطيه كانو كتير و الحوالينا كانو جبناء ومايأستش

كنت غلطان ...كنت غلطان لما نزلت في صحوة المحله 2008 و اشتبكت انا والي معايا مع الامن المركزي وشوفت مجازر بتحصل ساعتها و اترميت في امن الدوله تاني 6 شهور بحالهم 

وكنت غلطان و انا مرمي في امن الدوله مخاتش اهلي يعملوا اعلانات فالجرايد ولا نداءات فالتلفزيون ولا هيصه وبروبجندا علشان يطلعوني 

كنت غلطان...كنت غلطان انو بعد التعذيب و الجلد والكهربا مطلعتش على قناه فضائيه ولا رفعت قضيه و عملت شو كبير علشان يتقال عليا مناضل و بطل والناس تعرفني وعملتلي كتاب عن الفظائع الي شوفتاها فالمعتقل وكم المعاناه الي انا عشت فيه في ظلمات السجون

كنت غلطان ...كنت غلطان  اني لما الثوره قامت مخدتش معايا واحد صحبي  يقعد يصور فيا فالمظاهرات علشان انزل الصور على الفيس بوك ويبقى عندي دليل اني ثورجي و بحب بلدي

كنت غلطان.....كنت غلطان انو لما الجيش نزل متصورتش على الدبابات والمدرعات علشان يبقى عندي دليل انو الجيش والشعب مش ايد واحده

كنت غلطان...كنت غلطان  اني يوم موقعة الجمل لما لقيت الجيش بيتفرج علينا و احنا بتقتل فالميدان جريت على البلطجيه ومهمنيش ومجريتش على حته فيها ناس بتصور ووقفت قدام الموت على مدخل عبدالمنعم رياض بنضرب بالمولوتوف والرصاص من البلطجيه بتهجم علنا من كل حته وانا واقف بدافع عن الميدان والناس بتموت قصاد عيني 

كنت غلطان ...كنت غلطان اني مجريتش فالهوجه وطلعتلي على اي قناه فضائيه و قولت انا من الثوار ووثقت في ناس تانيه و قولت مش مهم كلنا واحد

كنت غلطان ....كنت غلطان اني مطلعتش هتيف و حنجوري بصوت جهور و مبعفش اعبر عن نفسي غير بالرسم او بالكتابه فمعملتليش منصه ليا اقول عليها الي انا عاوزه

كنت غلطان ...كنت غلطان لما وقفت قدام عيله متجبشي 19 سنه فالميدان وتتنك عليك وتقولك احنا مش محتاجين منك حاجه قعد على الرصيف او اسمع الثوار بيقولوا ايه يمكن تفهم اقولك امشي ورا المسيره و قول وراهم انا مصدعه ومش فاضيالك

وكنت غلطان لما غلط كل الغلطات الي فاتت دي و افتكرت انو ليا مكان فالميدان