(فلسفه فارغه ...النظريه الجوبلزيه للتسويق الثوري (ثوره يابيه......على كام؟؟؟( الجزء الاول

خرجنا كلنا كشباب و شعب من يوم 25 ولينا مطلب واحد " الشعب يريد اسقاط النظام" واشتغلت علينا الآله الاعلاميه الضخمه بشكل مبالغ فيه في مصر سواء كانت حكوميه رسميه او حكوميه غير رسميه (متسألش كتير خد الكلمه وانت ساكت) او خاصه بس ماشيه بمبداء صبيان الحفافين والمطبلاتيه والي بيشوبشو ورا العوالم " دول اجندات خارجيه ..دول مأجورين ..دول تحالف القوى المعاديه ..دول عملاء ..دول عناصر إثاريه (الي امنية حياتي اعرف الاثاري ده يبقى ايه و سبب من اسباب اني منسحبتش من الميدان يوم 28 يناير انو التلفزيون قال في هجوم ايثاريين على الميدان حيحصل  كمان شويه واترزعت فيها 18 يوم مستني ام الايثاري ده ) دول عناصر خارجيه متأمره على مصر من ال سي اي ايه +حماس+ الموساد+ايران+افغان+ القاعده (ولو اميتاب باتشان كان فيه شوية صحه كانو حطوه معاهم ) اي حاجه غير اننا مصريين وزهقنا من الذل و القهر و الفساد والهوان والمرض والجهل والفقر  وكأننا كنا عايشين في نعمه وجنة والدنيا كلها حاسدانا عليها ( على ايه يا حسره  ايش ياخد الريح من البلاط ) وكان الشغل الشاغل ليهم تشويه صورتنا باي شكل من ااشكال من اول العماله والخيانه لحد الشذوذ الجنسي والفسق والتفسخ الاخلاقي ، المهم مهمناش و ربنان نصرنا و الباقي انتو عارفينو ( طب يبقى جاي تصدع دماغ الي خلفونا ليه بقى هي ناقصاك...انت ياد انا مش قلتلك تقعد ساكت) مربط الفرس انو نفس نغمة قبل الثوره واولها بترجع دلوقتي بس واحده واحده (منكو لله خربتوا البلد..هما الي فالتحرير دول عاوزين ايه تاني ..هما مش هيهمدوا الا اما البلد تخرب ...آدي الثوره بتاعتكو والي خدناه منها...حرام عليكو احنا عاوزين امان..البلطجيه طايحين فالبلد وانتو قاعدين هنا )وكأن كل مشاكل مصر سببها ال1/100 من تعداد مصر الي قاعد فالتحرير مستني يرجع للبلد الكرامه والعزه والحق  المسلوب في ابسط حقوق الانسانيه والحياه، المهم يا سيدي ابتدا الفار يلعب في عبي  والسؤال يطلع في نافوخي هو ايه الي حصل ولا هما كلهم كانو كده من الاول بس مكوناش واخدين بالنا ومعقوله يبقى في كده بعد الثوره ( هو في ثوره اصلاً ؟؟؟؟...نعم ياروح امك..)

سؤال عجيب ومستفز بس فيه وجهة نظر برضك هو ايه الي حصل خلاهم يسألو نفسهم اذا كان دي ثوره اصلاً ولا لأ وبعد فحص وتمحيص وتقفيش ( محدش يفهمني غلط ..العب يا فرغلي..اخرس يااد قولتلك )وجدت اننا غلطنا مجموعة غلطات جسيمه  نلخصها فالآتي :

اننا تركنا الآله الإعلاميه بكل مشملاتها هي الي تعبر عن الثوره بنفس الاشخاص الي كانو ضدها فالمتلقى محسش انو فيه ثوره 

اننا سيبنا مجموعه من الناس  تختزل الثوره في مجموعه من القيم الاخلاقيه وهمشت الدور السياسي  ليها

تفريغ الشحنه الايجابيه الي ابتدت تتكون عند الاغلبيه الصامته ( الكنبويه ) في حملات تنظيف الشوارع و دهان الرصيف و كاننا عملنا الثوره علشان نساعد صناعة البويات

الرجوع لمرحلة التفرد و التوحد السياسي و خرجنا من الميدان كل واحد على انتمائه السياسي للتيار الي هو تبعه 

عدم نشر صور وفظائع الداخليه والبلطجيه والاكتفاء بصور الشهداء و هما حلوين و زي القمر مش وهما سايحين في دمهم و مهروسين تحت المصفحات

عدم صياغة ايدولوجيه ثوريه و خطاب اعلامي يضمن بقاء (الكنبويه ) في موقف المؤيد للثوره او على الاقل ماخدوش موقف عدائي

طب والحل ( وهي ليها حل بعد ماسودتها في وشنا بالمنظر ده....لو اتكلمت تاني ياد حجيب سيرة امك بالغلط) 

الحل يكمن في نظريه جديده من نظريات الفلسفه الفرغه بتوعي الا وهي : تسويق الثوره ......ثوره ياهانم ,ثوره يا بيه ...على كام؟؟( اتفلسف على الي خلفونا بقى...ادهن كريم ياللا) اينعم ..تسويق الثوره 

ودي حنسوقها ازاي بقى اكيد مش حانزلهالكو في اوفر في كارفور اشتريها و تاخد عليها مكنسه..تسويق ثوره يعني تسويق فكر و ده مش اي فكر ده فكر سياسي ثوري ( يعني البوليس حيطب امتى ؟؟  ) يعني بكل بساطه عملية اتصال اعلاني سياسي (يعني ايه؟؟...اقفل بؤك ياللا الشراب بان )

يعني ايه " النشاط السياسي الموجه الذي يقوم به الساسه او الاعلاميون او افراد الشعب والذي يعكس اهدافاً سياسية محدده تتعلق بقضايا البيئة السياسية وتؤثر في الحكومه او الرأي العام أو الحياة الخاصة للافراد والشعوب من خلال وسائل الاتصال المتعدده"

(معناتو ايه الكلام ده ؟؟ انا اخلص منو تطلعلي انت) نفهم من كده انو لازم يكون في نشاط سياسي بيقوم بيه افراد من الشعب بعيداً عن المسميات لاهداف سياسيه محدده عن طريق وسائل الاتصال المختلفه (بس كده يا بيه ...لسه يا احف) المسأله لسه ليها عناصر تقوم عليها عملية الاتصال السياسي الاعلاني 

1-النشاط السياسي: وهو مضمون العمليه الاتصاليه السياسيه

2-القائم بالاتصال : وهم الساسه او مصمموا الأعلان السياسي .

3-الهدف : الذي يتضمن الاثر المنشود من الرساله سواء كان متعلقاً بوظيفة التأثير في الرأي العام او التأثير على فئة معينه من الجمهور  للحصول على نتيجه ايجابيه .

4-الوسيله : وهي كل وسيلة اتصال تجسد النشاط السياسي الذي يجسده المصمم من خلال السياق التصميمي للاعلان.

( لخص يا نجم مش فاهمين حاجه ..اخرس ياد يابن المشنوقه ) 

طب ده حلو قوي الكلام ده نسنجفو ازاي على الثوره (شايف ياد كلام الناس الكمل ) اقولك يا سيدي 

لازم اولاً ايجاد مجموعه من المفاهيم او هدف معين محدد للعمليه نفسها

تاني حاجه الاتفاق على كيان يكون مسؤل عن العمليه دي من بابها

تالت حاجه الاتفاق على الهدف النهائي للعمليه دي من بابها كده

نيجي بقى للمعضله الرئيسيه ....الوسيله ....علشان نقدر نعمل الي فات ده كله لازم نستخدم كل الوسائل المتاحه بس الي في نفس الوقت بتوصل للمتلقى ( يعني مش الفيس بوك و تويتر يا امور انت وهو واظن كلامي واضح ولو اسغبيت حأفإفلك) اولاً هو مين المتلقى بتاعنا (ودي عاوزه سؤال ...الشعب طبعاً ) كويس الشعب ده طبقات وكل طبقه ليها اسلوب حياه مختلف وبالتالي طريقة خطاب مختلفه (مانت كنت ماشي كويس حتعقدها تاني ليه...، اخرس ياللا يا جعر انت )  يعني الشاب الي بيشغل في محل غير موظف الحكومه غير موظف البورصه غير دكتور الجامعه غير المهندس غير رجل الاعمال (مممممم نظريه برضه ) يبقى لازم يكون عندنا وسائل توصل للكل وانا ارشح الآتي

1- شبكه اخباريه ليها مصداقيه كبيره ترفع مبداء الحقيقه اولاً مهما كان الثمن ، تنقل اخبار الثوار في كل مكان في مصر وتعملهم شرده على كل حاجه بيعملوها

2- محطه اذاعيه ثوريه تجذب الناس والشباب في مصر كلها ليها و اعتبارها هي صوت الثوره الوحيد 

3- بوسترات في كل حته وعلى اماكن مميزه داخل المدن برسائل متغيره لضمان استمرار التاثير 

4- تفعيل مجموعه من البرامج الحواريه بصوره مكثفة للتعبير الفكر الثوري

5- تصميم حمله اعلانيه طويلة المدى لتوجيه الرأي العام لصالح الثوره

وبالتالي ينتهي هنا الجزء الاول و في الاجزاء التاليه حنستفيض اكثر في شرح ازاي نصمم حمله إعلانيه سياسيه 

امضاء 

المحرض الاعظم

الاكس الكبير

PYROVISKY

: (فلسفه فارغه:" النظريه الاشراكيه التصعيديه للتحريض ( التحطيب السياسي"

تهدف هذه النظريه الى توحيد الصفوف والاتجاهات نحو تصعيد الاحتجاجات السلميه الى حالة العصيان المدني 

حينما اتجه بعض الثوار الى غلق مجمع التحرير بالقوه (والله اعلم بالنوايا ) استهجنت انا وغيري كثر (حلوه استهجنت دي )هذا التصرف الغير منظم والغير متفق عليه وفي مناقشه بيزنطيه اليكترونيه(ام الكلام المجعلص بتاعك يا اخي ) مع احد المسؤلين عن هذا التصرف كانت الردود تتلخص كالاتي

الرد الاول :متدنيش اوامر وانت قاعد في بتكو فالتكييف والمروحه وسايبنا نتشوي فالشمس والحر 

(طبعاً رديت وقلت انا فالصينيه وزي زيك ولو مضايق من الشمس والحر يا امور مكنتش اعتصمت فالصيف والمفروض قبل ماتعمل تصرف زي ده على الاقل افتح نقاش فيه مع باقي القوى السياسيه الي موجوده فالاعتصام زيها زيك )

الرد التاني: بلاش فلسفه فارغه احنا والحمد لله بنعرف نخطط و نفكر كويس قوي والعبره بالنهايه والعصيان المدني حنعلنو قريب قوي 

(طبعاً كان ردي برضه مهزب و قولت للشخصيه انو مافيش عصيان مدني بيجي بالعافيه و اننا كده بنخسر الشارع وفكرتوا اننا يوم 25 و 28 كنا بننادي و نقول يا اهالينا انضموا لينا مكناش بنجبر حد على حاجه وقدرنا نكسب تعاطف الناس وبالتالي قدرنا نكسب الشارع ولحد دلوقتي انا مسمعتش منك مبرر منطقي غير انو سيادتك حران و مأفئف من الشمس والحر و عينت نفسك وصي على الشعب تؤمر و الكل لازم يسمع كلامك )

الرد التالت : انا ماليش نفس ارد عليك 

(طبعاً كان ردي مهزب برضه بس مقدرش اقولوا هنا علشان في بنات ممكن تقرا التدوينه دي)

ومن هنا جت نظرية الفلسفه الفارغه وسميتها (((النظريه الاشراكيه التصعيديه للتحريض)))) بين قوسين ( التحطيب السياسي ) الي الهدف منها خلق حاله من التوافق الشعبي على التصعيد اولاً او على الاقل التعاطف معاه

وده نقدر نلخصه في اننا لازم نقنع الناس بالعصيان المدني( انت ياد عبيط ياد حنقنع الناس ازاي والاعلام كله بيهاجمنا...وهو من امتى مكانش بيهاجمنا يا احف انت وهو ) وكان لازم ندور على طريقه جديده ومبتكره....وفجأتن لقيتها التحريض ( دششششششششششششش "مؤثرات صوتيه ") 

دلوقتي احنا محتاجين نتقمص اهم صفه الاعلام بيحاول يوصمنا بيها من زمان اننا محرضين لازم كلنا نبقى محرضين بس بنظام

اولاً المرحله الاولى (النضال السعدي الوفدي لمكافحة الامبرياليه ):

 لازم يكون عندنا كاتب ثوري قراري ابن حنت يكتبلنا كام منشور يهيج الدنيا و يبين للموظفين والعمال انهم كلوا على قفاهم وان الحكومه باعتلهم الترماي و شربتهم مغرز وحتغلي السلع والبنزين ومش حتزود المرتبات علشان يفضلوا شحاتين ومش لاقيين والاغنيا يتحكموا فيهم اكتر

تاني حاجه كام منشور عن مدى حماية المجلس العسكري للنظام البائد و الصفقات الي اتعملت وكلها ضد الثوره علشان يحموا رموز الفساد و منعرفشي ناخد فلوسنا منهم

طبعاً واحد فيكو حيقولي ماحنا عارفين الكلام دوان  (قعد ساكت ياد لحد اما اخلص كلامي ) المنشورات دي لازم نوزعها على الموظفين والعمال وهما داخلين اشغالهم و ياريت الي يوزعهم يبقو بنات شيك من القطائيط بتوع ال ايه يو سي بابتسامه حلوه علشان ياخد المنشور اصلاً (طبعاً احنا لو بعتنا خناشير ولا حريم مصديه حيفتكروهم بيشحتو و يقولهم الله يسهلك ولا يحنن )

المرحله الثانيه : (المرحله التسويقيه التحريضيه الكبرى) بين قوسين( الاشورز) وقولوها بمياصه 

المرحله دي مهمه نتبع فيها نظرية البيع الشخصي يعني كام شاب كده على كام شابه يلبسوا و يتشيكوا و يقوموا داخلين على المصلحه او الاداره او اياً كان المكان الي حيدخلوه صباح الخير ممكن اخد من وقتك دقيقه و ياكل ودانه بقى على الموضوع و يديلو المنشور و يبينلوا هو اد ايه العصيان المدني في مصلحته  واننا عملنا الثوره علشان الغلابه وان حت بعد الثوره الحكومه مستكتره انو ظروفه تتحسن وانو يكسب الي يكفيه بالحلال وانها عاوزاه يفضل طول عمره ماكينة تصنيع فلوس للاغنياء انو في نظر الحكومه المتأمره لازم يفضل شحات علشان الاغنيا يكسبو و يتهنوا

المرحلة التالته (مرحلة المسكنه ): 

هنا بقى نجيب بقى العيال المصديه والخناشير الي مللحوا من الشمس  بشكلهم العار ده ومش كتير 50 60 واحد بالكتير يعملوا وقفة شحاته و مسكنه قدام المكان الي فيه الشباب بتوع المرحله التانيه علشان الي شاف العيال النضيفه لما يشوف دول يصعب عليه انهم يبقوا كده ولما يلاقي عددهم قليل يصعبوا عليهم اكتر و يقول يا ولداه العيال اتعدموا العافيه علشاننا و انشاء الله النخوه ساعتها تطلع وابن البلد يبان على اصله والجمله المشهوره تطلع احنا حنسيب العيال واقفه لوحدها  قدام الظلم ده كله داحنا حتى منبقاش رجاله (جواااز عتريس من فؤاده باطل )

المرحله السريه ( مصر امانه بين ايديك يا رأفت ) مرحلة ليفي كوهين

طبعاً واحد فيكو حيتفلحص ويقولي احنا حنخش المصلحه او المكان ازاي اصلاً (انت ياد عبيط ياد تفتكر يعني انها عدت عليا )

قبل المراحل دي كلها لازم نجند عميل لينا جوا المكان يدرس المكان كويس و يمدنا بالمعلومات زي ( مين القيادات الي جوا المكان ده ومين الي لو جبناه في صفنا المكان كله حيمشي ورا كلامه نقعد مع مين و منقعدش مع مين مين الثورجيه الي جوه مفاتيح شخصياتهم ايه  كل ده ( شوفت بقى يالا انها معدتش عليا ) ووقت اللزوم اول واحد يقول جواز عتريس من فؤاده باطل يكون العميل بتاعنا ....بس كده لأ يا احف منك ليه لها له 

المرحله الرابعه والاخيره (حريقه الغيطان )

طبعاً بناء على المعلومات الي حيمدنا بيها ليفي كوهين بتاعنا حنقدر نحدد انهي مكان الي نركز عليه اكتر واول اما ننجح فالمكان و بما اننا شعب اللووود قوي شبكة اللفيهات كوهينات الي احنا مجندينها ننشر الخبر في كل المصالح والاماكن التانيه الي الرجاله بتوعنا يسخنوالي فيها على الموضوع (هما يعني اجدع مننا ولا ايه داحنا نلبس طرح احسن ) زريبيوووووو كرسي فالكلوب وفي اقل ساعتين يبقى الخبر مالي البلد والفضائيات انو في بوادر عصيان مدني رجالتنا بقى تحاول تستدرج المصريين الاصلا دول للتحرير الي حنكون جاهزينلهم بكل ما تشتهي الانفس منشورات على مطبوعات على يفط على منصه كبيره تحرض فالي خلفوهم (ولو حد جاب سيرة الدستور ولا الانتخابات ولا الاخوان او مجلس الشعب حطلع تربنتين امه ) حقوقك ...عرضك ...شرفك...ولادك....ذلوك...اهانوك....سففوك التراب كده يعني 

في نفس الوقت لازم تجنيد اكبر كم ممكن من المداخلات التليفونيه على كل الفضائيات عاوزين سياح و شرده و فضيحه بجلاجل في كل حته انو الناس ابتدت تهيج على الحكومه و تنضم للثوار كده يعني ..وكمان 2 او تلاته واحد متحدث رسمي يبقى شخصيه محترمه مشلازم يكون شاب بس يبقى واجهه  ومعاه اتنين ممثلين للحركه (سموها زي ماتسموها بس بلاش ائتلاف مش ناقصين نحس احنا ) وبكده تنتهي النظريه والي عاجبو على كده عاجبو والي مش عاجبو يشد في حواجبه

امضاء 

المحرض الاعظم

الاكس الكبير 

PYROVISKY

مُزة التحرير

التاريخ 4 فبراير  الزمن الساعة 2 صباحاً
هداء الوضع نسبياً وانسحب البلطجيه من امام مدخل عبد المنعم رياض و قررت ان اخذ استراحة محارب وادخن سيجاره و بما اني فالشارع من يوم 28 فطبعاً ساجايري خلصت  فعزم عليا عب عبده ( اسطى نجار من عابدين عنده 57 سنه بس كان مسوى الهوايل فالمعركه وبيفهم فالسياسه احسن من النخبه المزيفه ) بسيجاره سوبر  خشبها قليل حبتين و كنت حاسس بوجع في كتفي من كتر الضرب و رمي الطوب كنت متعور في دماغي في تلات حتت  و الدم متجلط على وشي مخلي منظري عار الصراحه بس مكانتشي فارقه معايا الصراحه يعني مين حياخد بالو منك يا خي دانت وانت متشيك وعلى سنجة عشره مافيش بت استعنت تبصلك اصلاً  ولا حتى تلمحك وهي بترمش حتبصلك وانت متهبب كده وكمان احنا في ايه ولا في ايه المهم قعدت انا و عم عبده بندخن السوبر المعموله من خشب معتبر المره دي و بنحلم امتى حننتصر على البلطجيه و الشعب كله بنزل يحارب النظام و امتى نقول (مبارك هرب ...مبارك هرب  ) زي الراجل بتاع تونس و حسيت بحد بيقرب علينا مسكت الشومه و تبت عليها وعم عبده امن على طوبه كانت جنبه طبعاً النور كان مقطوع فالميدان فمعتمدين على نور الحرايق والكاوتش المولع الي عند المتاريس وابتدت الرؤيه توضح طلعوا بنتين جايبين ميه و اكل و يشوفوا لو في حد مصاب ولا حاجه ياخدو على المستشفى الميداني (الي كانت بتبقى حوش عماره ولا قهوه و فارشين لنا حصيرتين و ملايتين على الارض ..هههه ال مستشفى ال بس اهو الشاطره تغزل برجل حمار ) المهم قربوا علينا و واحده منهم شافتني و انا مبطوح  قالت لصاحبتها في واحد مصاب  اهو تعالي بسرعه و جم لسه حقولها انا كويس لقيتها بكل قوه وحزم  قامت مقعداني على ركبي و مسكت دماغي بتقلب فيها  زي البطيخه الشليان و قامت سالاني انت حاسس بدوخه او زغلله  قلتلها لا قامت عادله راسي لفوق و لاول مره اشوف ملامحها هي تقريباً بيضه بس المظاهرات و الجو عاملين شغل برضه وهي كانت متصابه قبل كده فعينها وارمه سيكه بشوية زرقان  و فوق حاجبها مقتوح لازقه عليه بلاستر وشعرها بني لماه ديل حصان و زي القمر بنت اللعيبه وشكلها رقيق قوي بس رسمه وش القفش علشان الوضع الي احنا فيه امال كنت عاوزها تسبلك يا احف متحاصرين فالميدان وبننضرب بطوب ومولوتوف وحديد خرده وخراطيش و قناصه مرشقين في كل حته والبت متصابه في وشها (وتعويرة الوش مافيهاش معلش ) وشايفه مناظر عار يا عيني الي مبطوح و الي متعور والي عينه بتنزف والي محروق والي جايب كرتونه لاففها على جسمه قال يعني درع واقي من الطوب والي لابس حله على دماغه احسن يتبطح والي قاطع جركن وعامله خوذه كان شكلنا مرستان الحقيقه بس الوضع كله كان سيريالي صرف حنعمل ايه ادي الله وادي حكمته المهم عدلت وشي ناحيتها و من غير كلام ابتدت تغسلي وشي ....قلبي هفهف والله و باضتلك فالقفص ياد ابتديت اركز اكتر ...باين عليها بنت ناس تجيلها كده حوالي 25 26 سنه بالكتير لبسها مبهدل من النوم على الارض بس باين انها شيك ،متفجرة الانوثه(مزه مزه يعني اووووف وتكه بنت الايه ) بس بمية راجل وميتخافشي عليها ابداً مدت ايديها و بتغسلي وشي من الدم المتجلط  الي مخلوط بغبار المعركه وحاسيت انها مش بتغسلي وشي بس دي بتغسلي ورحي من جوه بتغسلي قلبي  من سواد الذل والقهر فالمعتقل السنين الي فاتت كلها مكانتش بتنزل الدم وتراب الميدان من على وشي كانت كل لمسه من ايدها على وشي بتهد احساسي بالضعف و بتبني قوه سبعتلاف سنه جوايا كانت بتغسلي وشي  بس فالحقيقه كانت بتطهرني من احاسيس البلاده ولامبالاه الي اترسبت جوانا من معاناة غيرنا من الشعب كانت بتشيل الدم من على وشي و بتنزع كل احساس اناني جوايا  ولقيتني بقول لروحي اهي دي الواحد يديها عمره وهو راضي بقى بالذمه الملاك ده متضحيش بروحك علشان تحميها ياد ده دي والي زيها مهددين بالانقراض ياااااه هو لسه في من الصنف ده هي دي الي تربي رجاله  مصريين اصلا يفدو بلدهم ويموتوا فدا ترابها والي يلاقي واحده زي دي يعيش خدام تحت رجليها  ،مش لابسه دبله في ايدها اليمين ومش شايف ايدها الشمال اصلها ماسكه بيها الازازه بتاعت الميه فوق راسي الجرح الي قي قورتي ابتدا يبان حسيت برغرغة في عنيها (طبعاً بعد كده عرفت انو العضم كان باين و انا خدت فالجرح ده لوحده 16 غرزه ) قولتلها متخافيش ياما دقت على الراس طبول ضحكت اوووووووووووو الشمس طلعت يا جدعان ايه الغمازات دي ايه الطعامه اييييوه كده يا وديييييع ردت فيا الروح بقى هاين عليا اطلع اجري فالشوارع اطحن البلطجيه طحن بصتلي بكل حنيه و هي مكسوفه وقالتلي ملقيتش حاجه اجيبهالكو غير ازازتين ميه و وشوية بلح بس الصبح لو جالنا اكل حاجيبلوكو تاني  الله اكبر حاتيجي تاني حاتيجي تاني حاتيجي تاني قولتلها ولا يهمك خلي بالك من نفسك المهم طبعاً انا كنت ولا قادر اصلب طولي من قلة الاكل وعطشان عطش ما يتوصفش بس كنت ممثل اني جامد و برد عليها بنشفان ودت وشها الناحيه التانيه و كان باين عليها مكسوفه لسه حقولها انت اسمك ايه او انت مين وتبع حركة ايه او اعرف عنها اي معلومه اشتغلت الصفافير و كان في هجمه للبلطجيه علينا و لقيتها بتقولي بصوت قوي بلهجة امر  قوم يا بطل احمي ارضك ومدريتش بنفسي الا وانا بقفش الشومه و بصرخ "الله اكبر" و بنط من فوق المتاريس و طايح ضرب فالبلطجيه والشباب عملوا زيي واتقدمنا في ميدان عبد المنعم رياض وكان هجوم انتحاري مننا وفي لحظه بص ورايا لقيتها واقفه على المتاريس و بتحدف طوب على البلطجيه و صاحبتها وعم عبده بيحاولوا يرجعوها ورا وهي ولا هاممها وفالآخر رجعوا واحنا كملنا وانتصرنا والوضع هدي ومن ساعتها وانا مش لاقيها ولا عرفت عنها اي حاجه والوضع هدي والبلطجيه بطلوا يجولنا على الميدان والبنات رجعوا زي الاول ملونين و متماكيجين ومتكوفرين وانا قاعد بدور بقالي 6 شهور على البت مزة التحرير

اين ميداني؟؟؟

كل يوم من 8 يوليو صباحاً وحتى ساعات متأخره من الليل اذهب للميدان 
هذا الميدان وقفت وحاربت من اجل الوصول اليه يوم 28 يناير ضربنا بالقنابل المسيله للدموع والرصاص المطاطي والحي ودهسنا تحت عربات الامن المركزي حتى نصل اليه و وصلنا ودافعت عنه هو من فيه يوم الاربعاء الدامي لم اهتم بسيل قنابل المولوتوف او دفعات رصاص القناصه قتلوا اصدقائي و من لا اعرفهم امام عيني لم ارتعد و ظللت على موقفي لم اخف لكن رأحة الدماء والعرق والبارود والحرائق كانت تدفع الدماء في عروقي لاستمر فالقتال و الهجوم الانتحاري في احيان كثيره  كنت افكر في الشهادة اولاً او النصر لم اعباء باي شئ المهم الميدان.....الميدان رمز انجاز هذا الجيل واصراره وتحديه وانتصاره على كل ما هو قذر في هذا البلد و داخل انفسنا ونفوس غيرنا
لا دري ماذا حدث كنت اكذب نفسي على مدار الايام السابقه ولكن اليوم كانت الفاجعه
تبدل ....تغير ..تزيف لا اعلم كل ما اعلمه ان رائحه الدماء العطره الممزوجة برائحة العرق الطاهر ورائحة الاحتراق للمولوتوف غبار المعارك والاشتباكات اختفت وحل محلها رائحة غريبه لب و سوداني و سندويتشات كبده و تين شوكي وعرق سوس وشاي وكسكسي و كشري ومهلبيه وتمر هندي وتيشيرتات على الرصيف وبطاطا وبياع مكرونه وجبنه وبياعين نضارات شمسيه ومنصه ودي جي واغني راب وشباب بيرقص وعيال بتجري في كل حته و شحاتين وبياعين مناديل و فل وامناء شرطه في كل حته ومخبرين الاقسام قاعدين وسطينا عادي وكاميرات و حبيبه و خناقات وهيصه و طبيخ وعندما كنت اتحدث مع احد الاصدقاء وجدتني اسمع احد الباعه يقولها و بالفم المليان والنبي داحنا الي مستحملينكوا .....دهشت كيف انا قاتلت من اجل هذا وهو اليوم يمن على بان ادافع عن حقوقه في نظير تصرفات عشوائيه تهدر حقوق شعب باكمله ومشيت في الميدان متفحصاً اكثر اغلب الوجوه نعرفها حاربنا و قاتلنا و بكينا و نزفنا سوياً 
فإذا كان الثوار كما هم و المكان هو نفس المكان فلماذا لا جد ميداني ؟؟؟؟؟؟

اتاريني كنت غلطان

اتاريني كنت غلطان

ام انا كنت مغفل بجد....ومغفل دي كمان قليله عليا

كنت غلطان ...كنت غلطان لما خرجت في مظاهرات 2000 لما الصهاينه كانوا بيدكوا غزه ساعة الانتفاضه التانيه وقتلوا الشهيد محمد الدره و احنا هيجنا الدنيا اغاني و مظاهرات واترميت في امن الدوله فيها شهرين ودي اول مره اخش فيها المكان ده 

كنت غلطان .....كنت غلطان لما سمعت في 2003 انو القناه بتاعتنا مفتوحه للسفن الامريكيه و حاملات الطائرات تعدي علشان تضرب العراق فخرجت في مظاهرات انا والي زيي قدام مجلس الشعب اتبهدلنا و اتضربنا و رمونا برضه في امن الدوله يجي شهرين برضه

كنت غلطان ....كنت غلطان لما طلعت من المعتقل قومت عامل معرض عن انتهاك حقوق الانسان في فلسطين وعملت لوح عن انتهاك حقوق الانسان في مصر فاترميت في المعتقل 4 شهور تاني وجابولي لوحي كلها حتى شغل الكليه و حرقوه قصاد عيني ولما بمبكت كسرولي دراعي علشان مرسمش تاني بس الحمد لله بعرف ارسم باليمين برضه(انا اصلاً اشول )

كنت غلطان ....كنت غلطان لما نزلت اقول لأ للتعديلات الدستوريه بتاعت 2005 واتضربت و اتسحلت قدام دار القضاء العالي وخدتلي اسبوعين تايم شير في لاظوغلي وخرجت على المظاهرات بتاعة كفايه و ضربونا تاني و سحلونا تاني ومهمناش

كنت غلطان ...كنت غلطان لما نزلت ارفض اعادة ترشيح مبارك واقول الانتخابات بتتزور و شوفت الصحفيات بتوع امن الدوله بيقلعوهم هدومهم فالشارع و بيهتكو عرضهم  وحاولت  تحمي الستات بس البلطيه كانو كتير و الحوالينا كانو جبناء ومايأستش

كنت غلطان ...كنت غلطان لما نزلت في صحوة المحله 2008 و اشتبكت انا والي معايا مع الامن المركزي وشوفت مجازر بتحصل ساعتها و اترميت في امن الدوله تاني 6 شهور بحالهم 

وكنت غلطان و انا مرمي في امن الدوله مخاتش اهلي يعملوا اعلانات فالجرايد ولا نداءات فالتلفزيون ولا هيصه وبروبجندا علشان يطلعوني 

كنت غلطان...كنت غلطان انو بعد التعذيب و الجلد والكهربا مطلعتش على قناه فضائيه ولا رفعت قضيه و عملت شو كبير علشان يتقال عليا مناضل و بطل والناس تعرفني وعملتلي كتاب عن الفظائع الي شوفتاها فالمعتقل وكم المعاناه الي انا عشت فيه في ظلمات السجون

كنت غلطان ...كنت غلطان  اني لما الثوره قامت مخدتش معايا واحد صحبي  يقعد يصور فيا فالمظاهرات علشان انزل الصور على الفيس بوك ويبقى عندي دليل اني ثورجي و بحب بلدي

كنت غلطان.....كنت غلطان انو لما الجيش نزل متصورتش على الدبابات والمدرعات علشان يبقى عندي دليل انو الجيش والشعب مش ايد واحده

كنت غلطان...كنت غلطان  اني يوم موقعة الجمل لما لقيت الجيش بيتفرج علينا و احنا بتقتل فالميدان جريت على البلطجيه ومهمنيش ومجريتش على حته فيها ناس بتصور ووقفت قدام الموت على مدخل عبدالمنعم رياض بنضرب بالمولوتوف والرصاص من البلطجيه بتهجم علنا من كل حته وانا واقف بدافع عن الميدان والناس بتموت قصاد عيني 

كنت غلطان ...كنت غلطان اني مجريتش فالهوجه وطلعتلي على اي قناه فضائيه و قولت انا من الثوار ووثقت في ناس تانيه و قولت مش مهم كلنا واحد

كنت غلطان ....كنت غلطان اني مطلعتش هتيف و حنجوري بصوت جهور و مبعفش اعبر عن نفسي غير بالرسم او بالكتابه فمعملتليش منصه ليا اقول عليها الي انا عاوزه

كنت غلطان ...كنت غلطان لما وقفت قدام عيله متجبشي 19 سنه فالميدان وتتنك عليك وتقولك احنا مش محتاجين منك حاجه قعد على الرصيف او اسمع الثوار بيقولوا ايه يمكن تفهم اقولك امشي ورا المسيره و قول وراهم انا مصدعه ومش فاضيالك

وكنت غلطان لما غلط كل الغلطات الي فاتت دي و افتكرت انو ليا مكان فالميدان